முகநூற் பதிவுகள் சிலவும் , எதிர்வினைகள் சிலவும்!

கோகிலம் சுப்பையாவை எழுத்தாளர் நந்தினி சேவியர் முகநூலில் நினைவுபடுத்தியிருந்தார். வீரகேசரி பிரசுரமாக வெளியான இவரது ‘தூரத்துப்பச்சை’ மலையக இலக்கியத்துக்கு, தமிழ் இலக்கியத்துக்கு வளம் சேர்த்த, சேர்க்கும் முக்கியமானதொரு படைப்பு. நாவலில் வரும் வள்ளி என்னும் பாத்திரம் மறக்க முடியாத பாத்திரம். தகழியின் தோட்டியின் மகனை வாசித்தபொழுது ஏற்பட்ட உணர்வு எனக்கு இந்நாவலை வாசிக்கையிலும் ஏற்பட்டது. இரு நாவல்களுமே மானுட வாழ்வின் குழந்தையிலிருந்து முதுமை வரையிலான போராட்டத்தை, சமூக, அரசியற் சூழல்கள் ஏற்படுத்தும் தாக்கத்தின் விளைவுகளை வெளிப்படுத்துவதாக அமைந்த நாவல்கள். மீண்டும் அவரது ‘தூரத்துப் பச்சை’ நாவலினைப் வாசிக்க வேண்டுமென்ற உணர்வினை நந்தினி சேவியரின் நினைவூட்டல் ஏற்படுத்திவிட்டது.

நந்தினி சேவியரின் பதிவில் எழுத்தாளர் ஜவாத் மரைக்கார் அவர்கள் ‘தூரத்துப்பச்சை’ (வீரகேசரி பிரசுரம்) அட்டையினைப் பகிர்ந்திருந்தார்.அதனை நன்றியுடன் இங்கு பகிர்கின்றேன்.

---

முகநூல் எதிர்வினைகள் சில:

Iravi Arunasalam : ஈழத்துத் தமிழிலக்கியத்தில் கோகிலம் சுப்பையா எழுத்திய ‘தூரத்துப்பச்சை’ நாவலுக்கு முக்கிய இடம் உண்டு. நான் இப்போதைய எழுத்தாளர் பலருக்கு அதைக் குறிப்பிட்டிருக்கிறேன். எல்லோரும் ‘அது எங்கு கிடைக்கும்?’ என்று கேட்கிறார்கள். யாராயினும் அந்நூலை மறுபிரசுரம் செய்யமாட்டார்களா?
Yamuna Nithiananthan:  அருமையான நாவல்….!!!
S Suresh Surendran: அந்த நாள் ஞாபகம் நெஞ்சிலே வந்தே… நண்பர்களே… நண்பர்களே…

Nadarajah Selvarajah தூரத்துப் பச்சை. கோகிலம் சுப்பையா. சென்னை 5: தமிழ்ப் புத்தகாலயம்;, 576 பைகிராப்ட்ஸ் ரோடு, 1வது பதிப்பு, செப்டெம்பர் 1964. (மதறாஸ் 3: ஜெனரல் பிரின்டர்ஸ்). 328 பக்கம், விலை: இந்திய ரூபா 5., அளவு: 18×12 சமீ.

தூரத்துப் பச்சை. கோகிலம் சுப்பையா. சென்னை 600 017: தமிழ்ப் புத்தகாலயம்;, இல.பு 3ஃ8, மாசிலாமணி தெரு, பாண்டிபஜார், தி.நகர், 2வது பதிப்பு, நவம்பர் 2002, 1வது வீரகேசரி பதிப்பு, செப்டெம்பர் 1964, (சென்னை 600006: சென்னை ஆர்ட் பிரின்டர்ஸ்)336 பக்கம், விலை: இந்திய ரூபா 95., அளவு: 18×12 சமீ.

தமிழ்நாட்டிலுள்ள சேத்தூர் கிராமத்திலிருந்து பஞ்சம், பட்டினி, வரட்சி என்பவற்றின் பாதிப்புக்களிலிருந்து தப்புவதற்காக கப்பலேறிய வேலனுடன் அவன் மகள் வள்ளி என்ற சிறுமியும் இலங்கைக்கு வருகிறாள். வரும்போது வள்ளி பட்ட துன்பத்தையும், அவர்கள் இலங்கையில் ஹமில்டன் தோட்டத்தை அடைவதையும் விபரிக்கும் இந்நாவல், வள்ளி வளர்ந்து பெரியவளாகி செங்கமலை என்பவனைத் திருமணம் செய்து ராசீக் கொள்ளைராசாத் தோட்டத்துக்கு குடியிருக்க வருவதைப் பற்றியும் விபரிக்கிறது. வள்ளிக்குப் பிள்ளைகள் பிறந்து அப்பிள்ளைகளுக்குப் பிள்ளைகள் பிறக்கும் வரையிலான 4 தலைமுறைகள் பற்றி எழுதப்பட்ட இந்நாவல் ஒரு தோட்டத்துப் பெண் தன் வாழ்நாளில்படும் துன்பங்கள் அத்தனையையும் விபரிக்கின்றது. அரசியல்ரீதியில் தோட்டங்களில் தொழிற்சங்கங்கள் ஆரம்பிக்கப்பட்ட ஒரு காலகட்டத்தை இந்நாவலின் பிற்பகுதி பின்னணியாகக் கொண்டிருக்கின்றது. இந்நூலுக்கான முன்னுரையை செயின்ட் ஜோர்ஜ் கோட்டையிலிருந்து தமிழ்நாடு அரசின் பிரதம காரியதரிசி எஸ்.கே.செட்டூர் அவர்கள் வழங்கியிருக்கிறார்.

காலத்தால் அழியாத கானங்கள்: ‘எங்கிருந்தாலும் வாழ்க’

பாடகர் ஏ.எல்.ராகவனின் குரல் ஜெமினி கணேசனுக்கும் பொருந்தும்; நடிகர் கல்யாண்குமாருக்கும் பொருந்தும். நடிகர் நாகேசுக்கும் பொருந்தும். அவ்வகையில் குரல் மாற்றிப் பாடுவதில் அவரும் வல்லவர்.

ராகவன் பாடகர் மட்டுமல்லர். நடிகரும் கூட. குழந்தை நட்சத்திரமாக நடித்துப் பாடகராகக் கொடிகட்டிப்பறந்தவர். திரைப்படங்களையும் தயாரித்துள்ளார். இவரும் , டி.எம்.எஸ்ஸும் இணைந்து தயாரித்த திரைப்படமே ‘கல்லும் கனியாகும்’.